Сяргей Антусевіч выступіў у Вашынгтоне на акцыі ў падтрымку палітзняволеных
Намеснік старшыні Беларускага кангрэса дэмакратычных прафсаюзаў (БКДП) Сяргей Антусевіч прыняў удзел у цырымоніі Roll Call for Freedom, якая прайшла 30 кастрычніка каля Мемарыяла Лінкальна ў Вашынгтоне і была прымеркаваная да Міжнароднага дня палітычных зняволеных.
Падчас акцыі ўдзельнікі зачыталі імёны палітзняволеных з розных краін свету. Памяць тых, хто загінуў у зняволенні, ушанавалі хвілінай маўчання. Асобнае месца ў праграме занялі гісторыі палітзняволеных з Беларусі.
Прафсаюзны лідар, які сам правёў у зняволенні паўтара года, распавёў пра ўмовы, у якіх сёння ўтрымліваюць палітычных зняволеных у Беларусі.
- Тыя ўмовы, у якіх людзі адбываюць пакаранне, абсалютна не змяніліся са сталінскіх часоў. Гэта тая ж самая сістэма сталінскага ГУЛАГу, - сказаў ён.
Паводле Сяргея Антусевіча, вызваленне асобных палітзняволеных яшчэ не азначае спынення рэпрэсій: пакуль адны выходзяць на свабоду, у турмы трапляюць новыя людзі. Ён назваў тое, што адбываецца, «канвеерам» і заявіў, што ўлады Беларусі выкарыстоўваюць палітзняволеных як прадмет гандлю ў перамовах аб санкцыях.
Каля Мемарыяла Лінкальна прафсаюзны лідар таксама распавёў пра лёс актывіста прафсаюза РЭП Вацлава Арэшкі, якога ведае больш за 20 гадоў. Арэшка застаецца за кратамі і за час зняволення страціў зрок.
Для самога Антусевіча ўдзел у акцыі прыпаў амаль дакладна на трэцюю гадавіну вызвалення. 31 кастрычніка 2023 года ён выйшаў з магілёўскай калоніі № 15. У Вашынгтоне ён нагадаў, што многія яго калегі і знаёмыя па-ранейшаму застаюцца ў зняволенні.
Read in eng and rus
Comments