Беларускія ўлады вырашылі дысцыплінаваць будучыя кадры паказальным судом

У Мінску маладога спецыяліста паказальна судзілі перад навучэнцамі каледжа за няяўку па размеркаванні

21 кастрычніка ў Мінскім дзяржаўным каледжы гандлю і камерцыі прайшло выязное пасяджэнне суда па грамадзянскай справе аб спагнанні выдаткаў, панесеных дзяржавай на падрыхтоўку маладога спецыяліста.

На пасяджэнне спецыяльна запрасілі навучэнцаў выпускнога курса каледжа -- тых, каму неўзабаве трэба будзе працаваць па размеркаванні. Суд задаволіў пазоў аб спагнанні сродкаў з выпускніка, аднак памер сумы Мінскі гарадскі суд не паведаміў.

Пасля пасяджэння навучэнцаў, па сутнасці, пачалі запалохваць, якімі наступствамі можа абярнуцца адмова добраахвотна вярнуць дзяржаве выдаткі на навучанне. Акрамя самой запазычанасці, маладому спецыялісту давядзецца аплачваць судовыя выдаткі, а пры прымусовым выкананні рашэння — яшчэ і адпаведны збор.

Калі рашэнне суда не выконваецца, магчымыя абмежаванні на выезд з Беларусі і кіраванне аўтамабілем, арышт банкаўскіх рахункаў і маёмасці, а таксама ўтрыманне часткі заработнай платы.

Сам фармат мерапрыемства выглядаў цалкам адназначна: суд над адным выпускніком ператварылі ў наглядны сродак запалохвання для тых, каму толькі трэба будзе выйсці на працу па размеркаванні.

Замест размовы з будучымі спецыялістамі пра іх правы, заробак, умовы працы, перспектывы і прычыны, па якіх маладыя людзі не хочуць заставацца па размеркаванні, ім прадэманстравалі магчымыя наступствы адмовы. Фактычна будучым кадрам загадзя паказалі, што спроба самастойна распараджацца сваім працоўным жыццём можа скончыцца даўгамі, судамі і абмежаваннямі.

Read in eng