На канферэнцыі PERC у Сафіі падтрымалі кампанію за вызваленне Вольгі Брыцікавай
8–9 кастрычніка ў Сафіі прайшла жаночая канферэнцыя PERC, прысвечаная эканоміцы клопату, годнай працы і ролі прафсаюзаў у абароне работнікаў сферы догляду. У мерапрыемстве ўзяла ўдзел прадстаўніца незалежных прафсаюзаў ад БКДП Марыя Тарадзецкая.
Канферэнцыя праходзіла пад тэмай «Эканоміка клопату — ад дэкларацый да дзеянняў дзеля годнай працы». У праграме былі пытанні стандартаў і інструментаў Міжнароднай арганізацыі працы, арганізацыі і прадстаўніцтва работнікаў сферы догляду, нацыянальнага досведу прафсаюзаў, а таксама вызначэння прыярытэтаў і плана працы Жаночага камітэта PERC на 2026–2030 гады. У дыскусіях удзельнічалі прадстаўнікі міжнароднага прафсаюзнага руху, у тым ліку ITUC і EPSU.
Асобнай часткай удзелу беларускай дэлегацыі стала салідарнасць з палітзняволенай і актывісткай незалежнага прафсаюзнага руху Вольгай Брыцікавай. Марыя Тарадзецкая прывезла ў Сафію паштоўкі з патрабаваннем яе вызвалення, і ўдзельніцы канферэнцыі далучыліся да кампаніі ў падтрымку беларускай прафсаюзнай актывісткі.
Гэтая акцыя набывае асаблівае значэнне на фоне апошніх звестак пра ўмовы ўтрымання Брыцікавай. Паводле інфармацыі праваабарончага цэнтра «Вясна», у канцы мая Вольгу на сем сутак змясцілі ў штрафны ізалятар калоніі №4 у Гомелі. Прычына пакарання невядомая. Праваабаронцы таксама паведамлялі, што перад змяшчэннем у ШІЗА яе не агледзеў лекар.
Вольга Брыцікава — былая лідарка Беларускага Незалежнага прафсаюза на ААТ «Нафтан». Яна адпрацавала на прадпрыемстве 16 гадоў, стала адным з найбольш заўважных галасоў працоўнага руху ў 2020 годзе і пазней была звольненая. Сёння яна адбывае шасцігадовы тэрмін зняволення.
Марыя Тарадзецкая падкрэсліла, што ўдзел у такіх міжнародных пляцоўках важны для захавання сувязі беларускага незалежнага прафсаюзнага руху з міжнароднымі партнёрамі:
«Для нас як інстытута незалежных прафсаюзаў Беларусі ўдзел у такіх міжнародных пляцоўках — гэта магчымасць умацоўваць сувязь з глабальным прафсаюзным рухам, абменьвацца досведам і інтэграваць актуальныя міжнародныя падыходы ва ўласную дзейнасць».
Паводле яе слоў, дыскусіі з удзелам прадстаўнікоў МАП, Міжнароднай канфедэрацыі прафсаюзаў і іншых дапамагаюць лепш разумець новыя стандарты і інструменты прасоўвання годнай працы, гендарнай роўнасці і прызнання каштоўнасці працы па доглядзе.
Для БКДП удзел у канферэнцыі стаў адначасова магчымасцю ўключаць беларускую прафсаюзную павестку ў міжнародныя дыскусіі і нагадваць пра тых, хто сёння знаходзіцца ў зняволенні за сваю грамадскую і прафсаюзную дзейнасць.
Comments