Аляксандр Ярашук сустрэўся ў Жэневе з Генеральным дырэктарам МАП

У Жэневе, у штаб-кватэры Міжнароднай арганізацыі працы, адбылася сустрэча Генеральнага дырэктара МАП Жыльбера Унгбо з лідарам Беларускага кангрэса дэмакратычных прафсаюзаў (БКДП) Аляксандрам Ярашуком, які правёў у зняволенні чатыры гады за сваю прафсаюзную дзейнасць.

Аляксандр Ярашук і Жыльбер Унгбо // фота - МАП

— Сустрэча прайшла ў вельмі цёплай атмасферы, — распавёў Аляксандр Ярашук. — Кіраўнік МАП валодае інфармацыяй аб сітуацыі з правамі працоўных у Беларусі і становішчы прафсаюзных палітвязняў, якія сёння застаюцца за кратамі.

Асаблівая ўвага падчас размовы была нададзена працяглым рэпрэсіям супраць незалежнага прафсаюзнага руху Беларусі. Сёння сярод тысячы палітвязняў — 20 прафсаюзных актывістаў. Некаторыя з іх адбываюць тэрміны да 15 гадоў пазбаўлення волі.

Асобна абмяркоўвалася практыка прымусовага выдварэння з краіны тых, хто цалкам адбыў тэрмін або трапіў у спісы вызваленых. У такіх людзей забіраюць пашпарты і пазбаўляюць пенсій. Менавіта так адбылося з Аляксандрам Ярашуком і Генадзем Фядынічам. Паводле ўдзельнікаў сустрэчы, Жыльбер Унгбо пацвердзіў, што гэтая інфармацыя яму вядомая.

Аляксандр Ярашук і Жыльбер Унгбо // фота - МАП

Беларускае пытанне штогод выносіцца на разгляд Міжнароднай канферэнцыі працы. Сёлета яно таксама будзе абмяркоўвацца ў чэрвені.

Акрамя сустрэчы з Генеральным дырэктарам МАП, у Аляксандра Ярашука ў Жэневе адбыліся перамовы з прадстаўнікамі працадаўцаў, дыпламатычнага корпусу і міжнародных прафсаюзных аб’яднанняў.

Read in rus and eng