Прафсаюзы ўсяго свету патрабуюць вызвалення ганконгскага актывіста Лі Чук-яна

Напярэдадні вынясення прысуду па справе Ганконгскага альянсу ў падтрымку патрыятычных дэмакратычных рухаў Кітая (Hong Kong Alliance) па абвінавачаннях, звязаных з нацыянальнай бяспекай, па ўсім свеце разгарнулася скаардынаваная кампанія салідарнасці. Быламу старшыні Альянсу і былому генеральнаму сакратару Канфедэрацыі прафсаюзаў Ганконга (HKCTU) Лі Чук-яну, а таксама былой намесніцы старшыні Альянсу Чоу Ханг-тун выстаўлены абвінавачанні ў «падбухторванні да падрыву дзяржаўнай улады». У выпадку абвінаваўчага прысуду ім пагражае да 10 гадоў пазбаўлення волі. Прысуд павінен быць абвешчаны ў пятніцу, 21 жніўня.

Lee Cheuk-yan // photo - hongkongfp.com

У адказ 90 прафсаюзаў з розных краін свету і розных галін аб’ядналіся з патрабаваннем неадкладнага вызвалення ганконгскіх прафсаюзнікаў. Найбуйнейшыя прафсаюзы Францыі, Вялікабрытаніі, Аўстраліі і Іспаніі таксама накіравалі звароты сваім міністрам замежных спраў і ў кітайскія консульствы, выказаўшы сур’ёзную занепакоенасць крымінальным пераследам актывістаў.

Савет глабальных прафсаюзаў, які базуецца ў Жэневе і прадстаўляе больш за 200 мільёнаў работнікаў па ўсім свеце, запусціў глабальную петыцыю, у якой асуджае пераслед прафсаюзных актывістаў як парушэнне фундаментальных правоў і змяшчаецца патрабаванне яго безумоўнага вызвалення.

У заяве адзначаецца, што ажыццяўленне права на сходы і аб’яднанне не з’яўляецца злачынствам, а адносіцца да асноўных правоў чалавека, абароненых Статутам ААН і міжнародным правам. Крыміналізацыя гэтых правоў, гаворыцца ў заяве, з’яўляецца «сур’ёзным парушэннем правоў чалавека і прынцыпу вяршэнства права».

Да патрабаванняў далучыліся і іншыя найбуйнейшыя міжнародныя прафсаюзныя аб’яднанні, уключаючы Міжнародную канфедэрацыю прафсаюзаў (ITUC), Інтэрнацыянал работнікаў будаўніцтва і дрэваапрацоўкі (BWI), IndustriALL Global Union, Міжнародную федэрацыю транспартнікаў (ITF), Міжнародную федэрацыю журналістаў (IFJ) і Інтэрнацыянал грамадскага абслугоўвання (PSI).

Асобна дзве найбуйнейшыя французскія прафсаюзныя канфедэрацыі — Французская дэмакратычная канфедэрацыя працы (CFDT) і Force Ouvrière (FO) — звярнуліся да міністра замежных спраў Францыі Жан-Ноэля Баро з заклікам адрэагаваць на рэпрэсіі супраць ганконгскіх прафсаюзных актывістаў і выкарыстаць дыпламатычныя каналы для ціску на Пекін з мэтай спынення сістэматычнага пераследу незалежных прафсаюзаў.

Аўстралійскі савет прафсаюзаў (ACTU) таксама звярнуўся да міністра замежных спраў Пені Вонг, падкрэсліўшы, што абарона дэмакратыі і прафсаюзных правоў не з’яўляецца злачынствам. ACTU заклікаў урад Аўстраліі запатрабаваць ад уладаў Кітая і Ганконга выканання міжнародных абавязацельстваў у галіне правоў чалавека, спынення крымінальнага пераследу Лі і яго неадкладнага вызвалення.

У Бразіліі прафцэнтр Central Sindical e Popular – Conlutas сумесна з 69 мясцовымі прафсаюзамі накіраваў ліст у кітайскае консульства з патрабаваннем безумоўнага вызвалення Лі і Чоу, а таксама адмены Закона аб нацыянальнай бяспецы. Аналагічныя лісты накіравалі брытанскі прафсаюз GMB і іспанская канфедэрацыя Comisiones Obreras (CCOO).

Беларускія незалежныя прафсаюзы далучаюцца да справядлівых патрабаванняў міжнароднага прафсаюзнага руху аб спыненні пераследу Лі Чук-яна і Чоу Ханг-тун і іх неадкладным вызваленні.

Сітуацыя ў Ганконгу шмат у чым сугучная таму, што адбываецца ў Беларусі, дзе прафсаюзны рух быў разгромлены ўладамі, а прафсаюзная дзейнасць і абарона свабоды аб’яднання сталі падставай для крымінальнага пераследу. У беларускіх турмах па-ранейшаму знаходзяцца дзясяткі прафсаюзных лідараў і актывістаў. Таму салідарнасць паміж незалежнымі прафсаюзнымі рухамі ў краінах, дзе свабода аб’яднання падвяргаецца сістэматычным рэпрэсіям, застаецца асабліва важнай для нас.

Read in eng and rus

Source: hklabourrights.org