Лідары БКДП узялі ўдзел у з’ездзе італьянскага нацыянальнага прафцэнтра UIL

Пра гэта на сваёй старонцы ў Facebook распавёў старшыня Беларускага кангрэса дэмакратычных прафсаюзаў (БКДП) Аляксандр Ярашук.

«Праз 34 гады я зноў у Падуі. У далёкім 1992 годзе мы прыязджалі разам з тагачасным міністрам сельскай гаспадаркі і харчавання, цяпер ужо нябожчыкам Фёдарам Міроціцкім, у гэты італьянскі горад. Гэта быў час вялікіх чаканняў і надзей на развіццё супрацоўніцтва Беларусі, якая нядаўна атрымала незалежнасць, з цывілізаваным светам. Па вядомых прычынах ім не суджана было здзейсніцца.

Шмат вады сплыло з таго часу. Лёс за гэтыя гады павёў мяне ў зусім нечаканым кірунку. Зрэшты, наколькі непрадказальным было перарыванне маёй шматабяцальнай чыноўніцкай кар’еры, настолькі ж яно было і чаканым. Урэшце я апынуўся там, дзе, верагодна, самым лёсам мне і было наканавана быць, — у прафсаюзным руху. І цяпер я разам са сваім калегам Максімам Пазняковым у Падуі бяру ўдзел у з’ездзе нацыянальнага прафцэнтра UIL. Гэта адзін з тых з’ездаў, якія надоўга застаюцца ў памяці. Тры тысячы дэлегатаў і каля тысячы гасцей ствараюць яму вельмі эмацыйную атмасферу.

Яе цудоўна дапаўняюць сваімі палымянымі прамовамі генеральны сакратар UIL П’ерпаала Бамбард’еры — прозвішча, цалкам адпаведнае яркаму прафсаюзнаму лідару, — дэлегаты з’езда і госці, у тым ліку прэм’ер-міністр Італіі Джорджа Мелоні. У яе выступленні выразна прагучала ацэнка ўрадам высокага аўтарытэту і сур’ёзнай ролі, якую сёння ў італьянскім грамадстве адыгрываюць прафсаюзы ў асобе UIL.

Спадзяюся, што свае эмацыйныя фарбы ў мазаіку з’езда дадала і міжнародная панэль «Крызіс міжнароднага права і вяртанне да права сілы», у якой я ўзяў удзел разам са сваімі калегамі з Венесуэлы, Ірана і Украіны. Галоўнай тэмай майго выступлення, разам з падзякай гаспадарам за салідарнасць з намі, стала катастрофа з правамі і свабодамі працоўных і прафсаюзаў у Беларусі. І, вядома, патрабаванне вызвалення маіх сяброў з незалежных прафсаюзаў краіны».

Крыніца: Facebook