Раней мы спыняліся на пытанні, што рабіць у выпадку скасавання шкоднасці па прафесіі? Разгледзім дадзенае пытанне з пункта гледжання калектыўнай працоўнай спрэчкі.
Згодна з артыкулам 377 Працоўнага кодэкса, Калектыўная працоўная спрэчка – гэта неўрэгуляваныя рознагалоссі бакоў калектыўных працоўных адносін наконт устанаўлення, змянення сацыяльна-эканамічных умоў працы і побыту работнікаў, заключэння, змянення, дапаўнення, выканання або спынення калектыўных дагавораў, пагадненняў.
Бакамі калектыўнай працоўнай спрэчкі з'яўляюцца наймальнік і работнікі ў асобе іх прадстаўнічых органаў (прафсаюз).
У выпадку ўзнікнення рознагалоссяў патрабаванні наймальніку зацвярджаюцца на сходзе, канферэнцыі большасцю галасоў прысутных работнікаў (дэлегатаў канферэнцыі). Сход лічыцца правамоцным, калі на ім прысутнічае больш за палову работнікаў, а канферэнцыя – не менш як дзве трэці дэлегатаў. Патрабаванні работнікаў выкладаюцца ў пісьмовай форме і накіроўваюцца наймальніку.
Наймальнік абавязаны разгледзець патрабаванні і ў пісьмовай форме не пазней як у дзесяцідзённы тэрмін з дня іх атрымання паведаміць аб сваім рашэнні прадстаўнічы орган работнікаў і ў трохдзённы тэрмін з даты адмовы ў задавальненні ўсіх або часткі патрабаванняў Дэпартамент дзяржаўнай інспекцыі працы Міністэрства працы і сацыяльнай абароны аб узніклай калектыўнай працоўнай спрэчцы.
Калектыўныя працоўныя спрэчкі разглядаюцца:
1) камісіяй па прымірэнню;
2) з удзелам пасярэдніка;
3) у працоўным арбітражы.
Разгляд калектыўнай працоўнай спрэчкі прымірыцельнай камісіяй з'яўляецца абавязковым.
У адпаведнасці з артыкулам 380 Працоўнага кодэкса пры адмове наймальніка ад задавальнення ўсіх або часткі патрабаванняў работнікаў або непаведамленні аб сваім рашэнні ў трохдзённы тэрмін ствараецца прымірыцельная камісія. Прымірыцельная камісія фарміруецца з прадстаўнікоў бакоў калектыўнай працоўнай спрэчкі на раўнапраўнай аснове. Члены прымірыцельнай камісіі могуць быць вызначаны папярэдне ў калектыўным дагаворы, пагадненні.
Прымірыцельная камісія праводзіць неабходныя перагаворы з прадстаўнічымі органамі работнікаў, наймальнікам і ў пяцідзённы тэрмін з даты яе стварэння прымае па пагадненню бакоў рашэнне па ўзнікшай калектыўнай працоўнай спрэчцы, якое афармляецца пратаколам і ў пісьмовай форме накіроўваецца бакам калектыўнай працоўнай спрэчкі.
Пры згодзе з рашэннем прымірыцельнай камісіі калектыўная працоўная спрэчка спыняецца. Пры недасягненні згоды ў прымірыцельнай камісіі бакі калектыўнай працоўнай спрэчкі па пагадненню паміж імі могуць звярнуцца да пасярэдніка або ў працоўны арбітраж.
Аб парадку разгляду калектыўнай працоўнай спрэчкі з удзелам пасярэдніка або працоўным арбітражом мы пагаворым у наступнай прафсаюзнай кансультацыі.
Вы можаце звярнуцца да нас за дапамогай. Калі ў Вас ёсць канкрэтная сітуацыя і вы не знайшлі тут адказу - вось спасылка на наш чат-бот, дзе вы атрымаеце індывідуальную кансультацыю.
Леанід СУДАЛЕНКА, юрыст Salidarnast e.V. з дваццацігадовым досведам у пытаннях абароны правоў працоўных Беларусі. Былы прававы інспектар дэмакратычнага прафсаюза РЭП, сябра праваабарончага цэнтру “Вясна”, лаўрэат міжнародных праваабарончых прэмій.
Read this text in рус
コメント