Суд без прысутнасці абвінавачанага ператвараецца ў інструмент запалохвання

Рэжым Аляксандра Лукашэнкі працягвае выкарыстоўваць механізм завочнага пераследу ў адносінах да прадстаўнікоў незалежнага прафсаюзнага руху. Нядаўні выпадак з Леанідам Судаленкам, юрыстам Salidarnast e.V., пралівае святло на палітычную матываванасць падобных абвінавачанняў.

Судаленка, які ў мінулым ужо адбываў пакаранне па палітычна матываванай справе, быў завочна асуджаны паўторна - і даведаўся пра гэта толькі праз год пасля свайго вызвалення. Як паведаміў сам праваабаронца, яму ўдалося атрымаць афіцыйны адказ ад намесніка генеральнага пракурора Беларусі Аляксея Стука. У лісце выкладзеныя прычыны новага прысуду: у якасці «рэчыўнага доказу віны» былі выкарыстаныя інтэрв'ю, якія Судаленка даваў розным незалежным СМІ пасля вызвалення.

Леанід Судаленка

Сярод пералічаных - незалежныя СМІ. Асноўны «склад злачынства» - гэта выказванні аб рэальных умовах утрымання зняволеных у папраўчых установах Беларусі. Намеснік генпракурора заявіў, што незалежныя СМІ прызнаныя ў краіне экстрэмісцкімі фармаваннямі, а іх дзейнасць - забароненай «за дыскрэдытацыю Рэспублікі Беларусь».

Гэтая заява яскрава ілюструе татальную крыміналізацыю свабоды слова і выказванне меркавання. Зварот да міжнароднай аўдыторыі і ўдзел у інтэрв'ю ператвараюцца ў падставу для крымінальнага пераследу ў Беларусі.

Максім Пазнякоў // photo ITUC

У падобную сітуацыю папаў і выконваючы абавязкі старшыні Беларускага кангрэса дэмакратычных прафсаюзаў (БКДП) Максім Пазнякоў. Ён аб'яўлены ў крымінальны вышук не толькі ў Беларусі, але і ў Расейскай Федэрацыі. Ягоная «віна» — удзел у міжнародных мерапрыемствах, дзе ён уздымае пытанні рэпрэсій супраць незалежнага прафсаюзнага руху, ліквідацыі БКДП і арышту дзясяткаў прафсаюзных лідараў і актывістаў.

Завочныя прыгаворы становяцца яшчэ адным інструментам палітычнага пераследу ў Беларусі. Яны выкарыстоўваюцца не ў мэтах правасуддзя, а як сродак запалохвання і падаўлення тых, хто адкрыта гаворыць аб рэпрэсіях, катаваннях і парушэнні працоўных правоў. Пытанне недапушчальнасці такога пераследу, уключаючы завочную форму абвінавачанняў у дачыненні да прафсаюзных актывістаў, узнімалася некалькі дзён таму на Міжнароднай канферэнцыі працы.

Read this text in eng or рус