62-гадовага Ігара Шуканава абвінавачваюць ва ўдзеле ў пратэстах і паклёпе на Аляксандра Лукашэнку, піша «Наша Ніва».
Закрыты судовы працэс па справе супрацоўніка лабараторыі інфарматыкі і сувязі Мазырскага нафтаперапрацоўчага завода пачнецца 26 лютага ў Мазырскім раённым судзе. Шуканаву прад'яўлены абвінавачанні па двух артыкулах Крымінальнага кодэкса.
Па ч. 2 арт. 367 КК РБ (“паклёп” у дачыненні да Лукашэнкі, сумешчаная з абвінавачаннем у здзяйсненні цяжкага ці асабліва цяжкага злачынства) яму пагражае пазбаўленне волі на тэрмін ад шасці месяцаў да шасці гадоў з адбываннем пакарання ў калоніі агульнага рэжыму.
Па ч. 1 арт. 342 КК РБ (удзел у акцыях пратэсту) Шуканаву можа быць прызначанае пакаранне ў выглядзе арышту ці да чатырох гадоў пазбаўлення волі ў калоніі строгага рэжыму.
Шуканаў быў затрыманы 1 жніўня 2024 года супрацоўнікамі ГУБАЗ, якія прыбылі з Мінска. Яго схапілі проста на працоўным месцы, пасля чаго на службовым аўтамабілі УАЗ-Патрыёт вывезлі з тэрыторыі завода.
На паркоўцы каля галоўнага ўваходу, дзе знаходзіліся відавочцы, сілавікі ўчынілі паказальнае затрыманне: яны выцягнулі Шуканава з машыны, кінулі тварам на асфальт, прыціснулі каленам галаву і надзелі кайданкі.
Характэрна, што раніцай таго ж дня Шуканава ўжо судзілі па адміністрацыйным артыкуле за распаўсюджванне "экстрэмісцкіх матэрыялаў". Тады яму прызначылі штраф і адпусцілі, але праз некалькі гадзін ізноў затрымалі.
Comments