Нягледзячы на спёку, дзясяткі беларусаў выйшлі 24 чэрвеня на цэнтральную плошчу Брэмена, каб выказаць сваю цвёрдую пазіцыю супраць размяшчэння ядзернай зброі ў Беларусі.
На Маркт Платц, галоўнай плошчы Брэмена, пратэстоўцы скандавалі ва ўнісон "Не ядзернай зброі!", а таксама лозунгі пратэсту 2020 года. Адзін з актывістаў, Андрэй Пятроўскі, звярнуўся да дэманстрантаў і прахожых з прамовай аб небяспецы расійскай ядзернай зброі.
Дзеянні ўзурпатара Лукашэнкі выклікаюць трывогу не толькі ў беларускіх грамадзян, але і ў суседніх з Беларуссю краін. Фактычна, увесь рэгіён становіцца закладнікам безадказных дзеянняў дыктатара, які спрабуе ўмацаваць ядравым узбраеннем сваю ўладу ў краіне.
Пратэст быў арганізаваны аб'яднаннем беларусаў у Германіі Razam і падтрыманы актывістамі Асацыяцыі "Салідарнасць". Да пратэстуючых падыходзілі мясцовыя жыхары, выказваючы цікавасць да падзей, якія разгортваюцца ў Беларусі. Некаторыя выказвалі падзяку за салідарнасць з украінскім народам і мужнасць беларускага народа, які працягвае сваю барацьбу.
Kommentit