Sep 14, 20231 min
У рэзалюцыі, ухваленай Еўрапарламентам 13 верасня, Аляксандр Лукашэнка названы саўдзельнікам дэпартацыі ўкраінскіх дзяцей з акупаваных рэгіёнаў Украіны ў лагеры ў Беларусі, дзе яны падвяргаюцца русіфікацыі і ідэалагічнай апрацоўцы.
Еўрапарламент лічыць, што Лукашэнка нясе адказнасць за гэтыя ваенныя злачынствы, аналагічна Уладзіміру Пуціну і Марыі Львовай-Бяловай.
Рэжым Лукашэнкі таксама асуджаецца за ўдзел у расейскай агрэсіі супраць Украіны, уключаючы забеспячэнне ўзбраеннямі, размяшчэнне расейскіх войскаў і пагрозы далучыцца да агрэсіі. Еўрапарламент заклікае да прадстаўлення беларускага кіраўніцтва перад спецтрыбуналам за ўдзел у злачынствах, учыненых Расіяй.
Парламентарыі таксама заклікаюць Еўрасаюз і дзяржавы-члены ЕС прымаць меры для крымінальнага пераследу беларускіх службовых асоб, якія ўчынілі злачынствы агрэсіі, ваенныя злачынствы, злачынствы супраць чалавечнасці і генацыду ў адносінах да Украіны.
Крыніца: dw.com